عجبببببببببببى

ياميت ندامه ع القلوب الخلا
لا محبة فيها ولا كراهه ولا
حتى يا قلبي الحزن ما عادش فيك
معلهش.. لك يوم برضه راح تتملا
عجبي
*******
حدوته عن جعران وعن خنفسه
اتقابلوا حوا بعض ساعة مسا
ولا قال لهم حد اختشوا عيب حرام
ولا حد قال دي علاقة متدنّسة
عجبي
*******
أنا إله الوجد رب الهيام
أضرب بسهم الوهم وهم الغرام
وهم الغرام من كتر ما هو لذيذ
رشقتْ انا ف صدري جميع السهام
عجبي
*******
زحام وأبواق سيارات مزعجة
للي يطول له رصيف.. يبقى نجا
لو كنت جنبي ياحبيبي أنا
مش كنت أشوف إن الحياة مبهجة
عجبي
*******
إيديا في جيوبي وقلبي طرب
سارح في غربة بس مش مغترب
وحدي لكين ونسان وماشي كده
وبابتعد ما اعرف.. أو باقترب
عجبي
*******
مرحب ربيع مرحب ربيع مرحبه
يا طفل يا للي ف دمي ناغا وحبا
علشان عيونك يا صغنّن هويت
حتى ديدان الأرض والأغربه
عجبي
*******
فتحت شباكي لشمس الصباح
ما دخلش منه غير عويل الرياح
وفتحت قلبي عشان ابوح بالألم
ما خرجش منه غير محبة وسماح
عجبي
*******
غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون.. وليه
رسمت وردة وبيت وقلب وعلم
عجبي
*******
انا الذي عمري اشتياق في اشتياق
و قطر داخل في محطة الفراق
قصدت نبع السم وشربت سم
من كتر شوقي وعشمي في الترياق
عجبي
*******
ياللي عرفت الحب يوم وانطوى
حِسّك تقال مشتاق لنبع الهوى
حِسّك تقول مشتاق لنبع الغرام
ده الحب.. مين داق منه قطرة.. ارتوى
عجبي
*******

المراه بلسم يداوى الجراح واحيانا بتكون سبب لكل الجراح وعجبى

مشكوووووررررررررر يا مالديني
بجد شديدة اوي

الله يخليك يا رامي ميرسي جداً